Bilinguismu democraticu?
S’annu colatu pro Sa Natzione apo publicatu s’articulu “Autonomie e D.P.R. n. 752/76: La potenza economica della dogana linguistica”. S’obiettivu itti cussu de acher videre un’esempiu de tutela linguistica chi produit economia pro sos Sudtirolesos. In sa pubblica amministrazione e in tottus sos servitzios pubblicos de Bolzano travallat solu chie tenet su patentinu linguisticu. Sa lezze no est incostituzionale: su prinzipiu est chi s’utente devet esser cumpresu dae s’operatore, ca si una pubblica amministrazione non si fachet cumprendere dae sos contribuentes si tratat de discriminazione. Pro custa rejone benit prima chie ischit sa limba de su locu e no atteros italianos.
Proitte apo attu custu e atteros esempios? Ca in Sardinna, a partire dae sos indipendentistas, non connoschimmos vene su valore politicu de sa “normalizzazione” de sa limba. E sa “normalizzazione” est una fase sotziale ki in Sardinna ‘enit a pustis de una standardizzazione de sa limba. E s’istandardizzazione est unu processu tecnicu e politicu.
Dae pacu est naschitu su comitatu “Bilinguismu democraticu”, chin Alexandra Porcu e atteros. Calicune pro sa revisione de sa LSC (sa Limba Sarda Comuna adottata chin sa giunta Soru), e calicune pro istituzionalizzare una macrodivisione de su Sardu in logudoresu e campidanesu. Jeo pesso chi toccat a esser craros e a non confundere sa linguistica chin sa politica, ca Porcu cando vaeddata de azzustare sa LSC e poi narat de esser “filo-campidanesa” no azzuat a ghettare abba supra su ‘ocu de sas brias pro sa limba. Sono brias chi a sos Sardos no interessana, e chi no azzuana nemmancu sos appassionatos e sos ispecialistas a fachere unu passu ainnantis a sa chistione, e chi finini pro azzuare, senza lu cherrere, sos italianistas. A sa matessi manera sos chi ana semper travallatu pro sa LSC non depene serrare sa janna a sa partetzipatzione tzivile espressa dai custu novu comitatu, e so abbarratu cuntentu de s’apertura atta dae Corraine e Corongiu in occasione de sa presentata de su novu Currettore regionale ortograficu Sardu online.
In su pianu politicu b’est unu puntu virmu chi non potimmos ignorare e chi in Sa Natzione ammos iscrittu dae annos: su Sardu non potet esser divisu. Dividere politicamente una limba cheret narrere dividere una natzione e sa sua “primogenitura” politica in d’onzi locu amministrativu, dae su prus artu gradu ‘e guvernu a s’uffitziu minore de unu Comune. Sa limba unica est s’urtima difesa contr’a s’Istatu-natzione italianu e a s’assimilatzionismu economicu e culturale chi l’at semper distintu. Si non cumprendimmos cust’aspettu politicu ammos a perdes tempu chin cussu linguisticu, e sa limba Sarda ata a sichire a morrere contr’a s’egemonia de cussa italiana. Chenza limba ammos a perder vintzas s’Autonomia.
No tenet tortu Pepe Corongiu cando narat chi sa LSC no est perfetta ma est s’unica chi tenimmos. Dae custu puntu virmu toccat de torrare a partire.
E poi cherjo ider sa die chi Diegu Corraine e Roberto Bolognesi s’ana istringher sa manu.
Adriano Bomboi.
Iscarica custu articulu in PDF
U.R.N. Sardinnya ONLINE
[...] cui io sono d’accordo con Adriano Bomboi che nel suo post dal titolo “Bilinguismu democràticu?” afferma “E poi cherjo ider sa die chi Diegu Corraine e Roberto Bolognesi s’ana istringher sa [...]
Chene bos ofèndere, però pro iscrìere a su mancu istudiaisidda unu cantu de règulas pro comente s’iscriet in sardu (règulas chi a die de oe sunt praticamente uguales pro totas sas “variantes”), est a nàrrere dòpias, atzentos, etc. A su mancu nois chi ddu cherimus ufitziale depimus “dare s’esempru”.