CSU festat sa Die in Tonara domìniga chi benit

Su Coordinamentu Sardu Ufitziale organizat Sa Die de Sa Sardigna in Tonara (NU) domìniga chi benit su 26 de abrile. Su tema de sa festa at a èssere “Sa Die 1794-2015: no at cambiadu nudda” chi cheret finas denùntziare su discùidu de su guvernu acadèmicu regionale pro s’identidade natzionalitària e linguìstica de sa Sardigna.
A pagas dies dae s’eventu, sa Giunta Regionale, s’est limitada a fàghere una delìbera de programatzione cun coberta finantziària in itinere e duncas sas tzelebratziones ufitziales si s’ant a fàghere, ant a èssere cosa de urtimera e improvisadas. In prus, isvilire sa festa cheret nàrrere a pònnere comente tema cussu de su màndigu (comente in passadu Sa Brigada Tàtari o Gramsci) chirchende in custa manera de minimare su significadu natzionalitàriu de sa festa.
In su mentres CSU proponet una festa de unidade natzionale, aberta a totus sos chi pensant chi sa Sardigna siat una natzione e apat una limba sua. Una festa, prus chi non una gerronada polìticu-culturale, mancari chi no ant a mancare sos momentos de livellu.
Gràtzias a s’agiudu de s’aministratzione comunale de Tonara, s’at a comintzare a sas 10 e 30 in su tzentru polifuntzionale de via della Regione. A pustis de sos saludos de sas autoridades, istèrrida de su CSU e arresonos istòricos. Posca interventos lìberos de chie at a bòlere nàrrere sa sua. Pro nche l’acabare mùsica popolare e pràngiu sotziale.
CSU aderit a su programa de Sa Die in Tundu e finas a s’idea de sas barchitas.
Benide in medas!

Su Coordinamentu pro su sardu ufitziale e s’Amministratzione Comunale de Tonara,
ti cumbindant a Sa Die: 1794-2015.
Dae tando no at cambiadu nudda.

Addòbiu pro sas tzelebratziones de sa Die de Sardigna e Assemblea diretiva de su CSU.
Tonara, 26 abrile 2015, tzentru polifunzionale comunale, via della Regione, h. 10.30, programa:

Saludu de sas autoridades
Istèrrida a incuru de su CSU
Arresonos istòricos
Arresonos de sos militantes
Dibàtitu lìberu
Mùsica e cantos popolares
Pràngiu.
Podet bènnere chie si siat. Amus a fàghere faeddare a totus sena relatziones longas. Sa partetzipatzione est lìbera e a s’indonu. Pro su pràngiu tocat a iscrìere e a pagare unu tantu. Est una festa, in fundu in fundu, Sa Die nostra.
Pro papare ti depes marcare a ristorante/pizzeria ”Il Castagneto”,
Pràngiu a 16 èuros.
Tel. 0784.610149 – 610005.

Iscarica custu articulu in PDF

Redazione SANATZIONE.EU

Be Sociable, Share!

    Commenta



    Per la pubblicazione i commenti dovranno essere approvati dalla Redazione.